Компания аталыштарындагы “адал”, “халал” сөздөрүнө тыюу салуу каралууда
Министрлер Кабинети компаниялардын аталыштарында “адал” жана “халал” сөздөрүн колдонууга тыюу салууну сунуштаган токтом долбоорун коомдук талкууга чыгарды.
Маалыматка ылайык, учурда Кыргызстанда аталышында бул сөздөр бар 120дан ашык юридикалык жак катталган.
Бирок мамлекеттик органдар айрым ишканалар бул терминдерди халал продукциясына же кызматтарына тиешеси жок болсо да маркетингдик максатта колдонуп жатканын белгилешет.
Долбоордун максаты - жарандарды жаңылыш маалыматтан коргоо жана “адал” түшүнүгүн анын чыныгы маанисине ылайык колдонуу. МинКабдын пикиринде, бул термин тиешелүү талаптарга жооп берген жана расмий тастыкталган товарлар менен кызмат көрсөтүүлөргө гана тиешелүү болушу керек.
Эгер сунушталган өзгөртүү кабыл алынса, жаңы катталган компаниялар фирмалык аталыштарында “адал” жана “халал” сөздөрүн пайдалана алышпайт.
