Курулуш тармагына заманбап технологияларды киргизүү талкууланды
11-июнда Курулуш, архитектура жана турак жай-коммуналдык чарба министрлигинде курулуш тармагына маалыматтык моделдөө (BIM) технологияларын киргизүү маселелерине арналган жумушчу кеңешме өттү. Бул тууралуу министрликтин басма сөз кызматы маалымдады.
Жыйын Курулуш министринин орун басары Бактыяр Станбековдун төрагалыгы алдында өтүп, ага министрликтин түзүмдүк бөлүмдөрүнүн өкүлдөрү, ошондой эле Россия, Казакстан жана Татарстандын BIM-моделдөө жаатындагы адистери онлайн форматта катышты.
Кеңешменин жүрүшүндө катышуучулар BIM технологияларын колдонуудагы эл аралык тажрыйба, мыкты тажрыйбалар жана ченемдик жөнгө салуу маселелери боюнча пикир алышты.
Ошондой эле курулуш тармагын санариптештирүүнүн келечеги жана жаңы технологияларды киргизүүнүн мүмкүнчүлүктөрү талкууланды.
Жыйынтыгында маалыматтык моделдөө технологияларын өнүктүрүү боюнча жумушчу топ түзүү чечими кабыл алынды.
Аталган топ ченемдик-укуктук базаны өркүндөтүү, санариптик технологияларды киргизүү иштерин координациялоо жана эл аралык тажрыйбаны өздөштүрүү менен алектенет.
Белгилей кетсек, BIM (Building Information Modeling) — курулуш объекттерин 3D форматта санариптик моделдөө жана алар тууралуу бардык маалыматтарды бирдиктүү системада башкарууга мүмкүндүк берген заманбап технология.
