Манас шаарында сел коркунучун азайтуу боюнча иштер жүрүүдө
Өзгөчө кырдаалдар министри Канатбек Чыныбаев Жалал-Абад облусуна болгон жумушчу сапарында Манас шаарында сел коркунучун азайтуу боюнча жүргүзүлүп жаткан иштерди текшерди. Бул тууралуу министрликтин басма сөз кызматы билдирди.
Маалыматка ылайык, министр Шор-Суу тилкесинде сел сууларынын агымын жөнгө салуу жана калктуу конуштарды коргоо максатында курулуп жаткан сел өткөрүүчү арыктардын курулушун көрүп чыкты.
Учурда бул жерде бетондон жасалган арыктар жана сел өткөрүүчү канал курулуп жатат. Мындан сырткары, сел кармоочу жай куруу да пландалууда.
Ошондой эле Таш-Көмүр шаарындагы №2 Республикалык өзүнчө куткаруу отрядынын 57-өрт-куткаруу бөлүгүнө да барып, оңдоо иштерин көзөмөлдөдү.
Маалыматка ылайык, оңдоо иштери мамлекеттик казынанын эсебинен жүргүзүлүүдө. Анын жыйынтыгында куткаруучулар үчүн заманбап жана ыңгайлуу шарттар түзүлүп, бөлүмдүн ишинин натыйжалуулугу жогорулайт.
Министр калктын коопсуздугун камсыз кылуу, өзгөчө кырдаалдардын алдын алуу жана куткаруу кызматтарынын материалдык-техникалык базасын чыңдоо мамлекеттин негизги артыкчылыктуу багыттарынын бири экенин белгиледи.
