Мотоцикл менен жайытты тебелеген жаран жоопкерчиликке тартылды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматы социалдык тармакта тараган видеонун негизинде жайыттарды бузуу фактысын аныктады.
Маалыматка ылайык, Instagram тармагындагы enduro_prokat.kg баракчасында жарыяланган видеодо эндуро мотоцикли менен жайыт жана жашыл аянттарды тебелеп жүргөн жаран тартылган. Жүргүзүлгөн текшерүүнүн жыйынтыгында анын өздүгү такталып, К. уулу К. экени белгилүү болгон.
Аталган факты боюнча Бишкек шаары жана Аламүдүн району боюнча регионалдык башкармалыктын инспекторлору тарабынан тиешелүү чаралар көрүлүп, жаран Укук бузуулар жөнүндө кодексине ылайык жоопкерчиликке тартылды. Натыйжада ага 5 миң 500 сом өлчөмүндө айып пул салынды.
Экологиялык жана техникалык көзөмөл кызматы жарандарды жайыттарды, жашыл аянттарды жана жаратылыш объекттерин коргоого чакырып, автоунаа жана мототранспорт каражаттары менен жер кыртышын бузуу экологияга олуттуу зыян алып келерин эскертти.
Мекеменин маалыматына ылайык, жайыттарды мыйзамсыз тебелеп-тепсөө жана бузуу фактылары үчүн мыйзам чегинде административдик жоопкерчилик каралган. Мындай мыйзам бузуулар үчүн 5 миң 500 сомдон 20 миң сомго чейин айып пул салынышы мүмкүн.
