Өлкө боюнча электромобилдер үчүн жаңы станциялар орнотулууда
«Кыргызстан улуттук электр тармагы» ААК өлкө боюнча электромобилдерди кубаттоочу станцияларды орнотуу иштерин улантууда. Долбоор Энергетика министрлигинин тапшырмасынын негизинде ишке ашырылууда.
Маалыматка ылайык, учурда Чүй, Нарын, Ысык-Көл жана Талас облустарында жалпысынан 30 даана кубаттоочу станция пайдаланууга берилди.
Нарын облусу – 8 даана;
Чүй облусу – 14 даана;
Ысык-Көл облусу – 6 даана;
Талас облусу – 2 даана.
Мекеме жыл соңуна чейин республика боюнча 100дөн ашуун электромобилдерди кубаттоочу станцияны орнотууну пландап жатат.
Долбоордун алкагында станциялар негизги калктуу конуштарга жана туристтик багыттарга жайгаштырылууда. Тактап айтканда, алар өлкөнүн башкы автоунаа жолдорунун боюна, Бишкек–Торугарт унаа жолуна, ошондой эле Чүй, Жалал-Абад жана Ысык-Көл облустарынын стратегиялык аймактарына курулууда.
Адистердин айтымында, ар бир станциянын кубаттуулугу 120 кВт болуп, электромобилдерди кыска убакыт ичинде тез кубаттоого мүмкүнчүлүк берет. Кубаттоочу жайлар «Кыргызстан улуттук электр тармагы» ААКтын өз каражаттарынын эсебинен курулууда.
Долбоордун негизги максаты — электромобиль ээлери үчүн өлкөнүн бардык аймактарында ыңгайлуу шарттарды түзүү, ошондой эле транспорт тармагындагы экологиялык көрсөткүчтөрдү жакшыртып, зыяндуу газдардын бөлүнүп чыгышын азайтуу.
