Түптө мыйзамсыз балык уулаган төрт жаран жоопкерчиликке тартылды
Ысык-Көл облусунун Түп районунда балык уулоонун эрежелерин бузган төрт жаран аныкталып, аларга тиешелүү чаралар көрүлдү.
Жаратылыш ресурстары, экология жана техникалык көзөмөл министрлигинин маалыматына ылайык, аймактык башкармалыктын кызматкерлери Ак-Суу жана Түп райондорундагы өзгөчө корголуучу жаратылыш аймактарында рейддик иш-чараларды өткөрүшкөн.
Текшерүүнүн жүрүшүндө Түп районунун Жылуу-Булак айылындагы суу жээгинен эки жаран, ал эми Корумду айылынан дагы эки жаран мыйзамсыз балык уулап жаткан жеринен кармалган.
Аталган фактылар боюнча төрт жаранга протоколдор түзүлүп, мыйзам талаптарына ылайык айып пулдар салынды.
Мындан тышкары, рейд учурунда Ак-Суу районунда жол боюндагы бир нече бактын кыйылганы аныкталган. Учурда бул факт боюнча тактоо жана териштирүү иштери жүргүзүлүүдө.
Министрлик жарандарды жаратылышты коргоо эрежелерин сактоого чакырып, мыйзамсыз аңчылыкка, балык уулоого жана бак-дарактарды кыюуга каршы көзөмөл күчөтүлгөнүн билдирди.
