Утилдештирилген жыйымдан түшкөн каражат 132 млн сомду түздү
2026-жылдын январь–май айларында утилдештирилген жыйымдан түшкөн каражаттын көлөмү 132,1 миллион сомду түздү. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.
"Эко Оператор" мамлекеттик ишканасынын маалыматына ылайык, аталган мезгилде жыйым төлөөчүлөрдүн саны да кыйла көбөйгөн. Тактап айтканда, алардын саны 50дөн 259 субъектке чейин өскөн. Ал эми каражат өткөн жылдын ушул мезгилине салыштырмалуу 115,4 миллион сомго көп чогулган.
Учурда калдыктарды сорттоо, кайра иштетүү жана утилизациялоо менен алектенген ишканалардын реестрин түзүү иштери жүргүзүлүүдө. Бүгүнкү күнгө чейин реестрге болжол менен 130 ишкана киргизилген. Алардын ичинен 63ү менен байланыш түзүлүп, 17си лицензияланган кайра иштетүүчү ишкана экени аныкталган.
Жүргүзүлүп жаткан иштер өлкөдө калдыктарды башкаруунун заманбап системасын өнүктүрүүгө, экологиялык коопсуздукту камсыздоого жана кайра иштетүү тармагындагы долбоорлорду колдоого багытталганы айтылды.
