Эмгек министрлигинде жарандардын кайрылуулары каралды
Эмгек, социалдык камсыздоо жана миграция министринин биринчи орун басары Камчыбек Досматов жарандарды кабыл алып, бир катар социалдык маселелер боюнча кайрылууларды укту. Бул тууралуу министрликтин басма сөз кызматы билдирди.
Маалыматка ылайык, кабыл алууда калкты социалдык жактан коргоо, жеке ассистент дайындоо, майыптуулук тобун өзгөртүү, улгайган жарандарды карылар үйүнө жайгаштыруу, социалдык контрактты ишке ашыруу жана мамлекеттик жөлөкпулдарды дайындоо боюнча маселелер каралды.
Мындан тышкары, балдарга төлөнүүчү ай сайынкы жөлөкпулдун токтотулушуна байланыштуу кайрылуулар да талкууланды.
Ар бир маселе боюнча жарандарга мыйзамдардын негизинде түшүндүрмөлөр берилип, көйгөйлөрдү чечүү үчүн тиешелүү түзүмдүк бөлүмдөргө тапшырмалар жүктөлдү.
