Көчмөндөр оюндарына карата электр тармактары жаңыланууда
Ысык-Көл облусунда электр тармактарын жаңылоо боюнча бир катар иштер аткарылды. Бул тууралуу Энергетика министрлигинин басма сөз кызматы билдирди.
Маалыматка ылайык, VI Дүйнөлүк көчмөндөр оюндары өтүүчү жайларды туруктуу жарык менен камсыздоо максатында 552 темир-бетон тирөөчү орнотулуп, 94,2 чакырым өзүн өзү көтөрүүчү изоляцияланган зымдар тартылды.
Ошондой эле Чолпон-Ата районунда жайкы туристтик сезонго даярдык көрүлүп, 67,2 чакырым жаңы зымдар тартылып, 15,2 чакырым эскирген алюминий зымдары алмаштырылды. Мындан тышкары, 401 темир-бетон тирөөчү орнотулду.
Жыл башынан бери 7,4 чакырым электр берүүчү аба чубалгылары жана 17 трансформатордук көмөк чордон капиталдык оңдоодон өткөрүлүп, 26,1 чакырым электр чубалгысы менен 67 көмөк чордондо техникалык тейлөө иштери жүргүзүлдү.
Адистердин айтымында, бул иштер электр энергиясы менен камсыздоонун сапатын жакшыртып, авариялык өчүрүүлөрдүн алдын алууга жана керектөөчүлөрдү туруктуу жарык менен камсыздоого шарт түзөт.
