Таласта курулуп жаткан объекттер 31-августта пайдаланууга берилет
11-июнда Курулуш, архитектура жана турак жай-коммуналдык чарба министри Нурдан Орунтаев менен президенттин Талас облусундагы ыйгарым укуктуу өкүлү Эрмат Жумаев Талас облусунда жана Талас шаарында курулуп жаткан бир катар ири объектилердин курулуш иштеринин жүрүшү менен жеринде таанышты. Бул тууралуу президенттин Таластагы өкүлү Эрмат Жумаев билдирди.
Маалыматка ылайык, "Манас Ордо" улуттук комплекси, "Баластан" оюн-зоок жана өнүктүрүү борбору, К.Нуржанов атындагы жөө адамдар үчүн аллеясы, заманбап 5500 орундуу борбордук стадион, ошондой эле Талас мамлекеттик университетинин жаңы 5 кабаттуу окуу кампусу сыяктуу маанилүү курулуштар кызуу жүрүп жатат.
Бул объектилер аймактын жаңы жүзүн калыптандырууга кызмат кылат. Аталган долбоорлор мамлекеттин эгемендүүлүгүнүн 35 жылдыгына арналган салтанаттуу иш-чаралардын алкагында пайдаланууга берилип, Президент Садыр Жапаровдун катышуусунда расмий ачылат.
