Жеке эсептерге кайрымдуулук үчүн акча чогултууга тыюу салуу демилгеленүүдө
Коомдук талкууга чыгарылган мыйзам долбооруна ылайык, кайрымдуулук үчүн каражаттарды жеке банктык эсептерге чогултууга тыюу салуу сунушталууда.
Маалыматка ылайык, долбоордо кайрымдуулук иш-чараларын өткөрүү үчүн атайын банктык эсеп ачуу милдеттендирилип, чогулган каражаттарды башка максаттарга пайдаланууга жол берилбейт.
Ошондой эле кайрымдуулук уюмдары жана акча чогулткан жарандар үчүн мамлекеттик электрондук портал түзүү сунушталууда. Анда алар катталып, каражаттардын сарпталышы боюнча отчет берип турушу керек болот.
Мындан тышкары, кайрымдуулук деген шылтоо менен акча чогултуп алдамчылык кылгандар үчүн жоопкерчиликти күчөтүү каралган.
Демилгечилердин айтымында, жаңы тартип интернеттеги алдамчылык жолу менен каражат чогултууларды азайтып, кайрымдуулук иштеринин ачык-айкындуулугун камсыздоого жардам берет.
