Грузиянын премьер-министри кыргыз элинин этномаданий мурасы менен таанышты
Президент Садыр Жапаров жана Грузиянын премьер-министри Ираклий Кобахидзе 13-июнда Ысык-Көл облусундагы Бостери айылында жайгашкан «Номад» этно-комплексинде уюштурулган этномаданий программага катышты.
Расмий сапардын алкагында өткөн иш-чарада конокторго кыргыз элинин каада-салттарын, аңчылык өнөрүн жана жоокердик мурасын чагылдырган этнографиялык көрсөтүүлөр тартууланды. Ошондой эле кыска концерттик программа уюштурулуп, төкмө акын салттуу өнөрүн көрсөттү.
Мамлекет башчылары боз үй шаарчасын кыдырып, комуз жасоо өнөрү, улуттук музыкалык аспаптар, кийизден буюм жасоо, зергерчилик, карапа жана темир устачылык сыяктуу элдик кол өнөрчүлүк менен таанышты. Ошондой эле манасчы тарабынан «Манас» эпосунан үзүндү аткарылды.
Иш-чаранын соңунда лидерлерге улуттук ат оюндары жана салттуу аңчылык өнөрү көрсөтүлдү. Программага бүркүт салуу, кыз куумай, ат үстүндөгү оюндар, жаа атуу жана каскадёр-чабандестердин парады кирди.
