Балыкчыдагы оорукананын жаңы имаратын куруу маселеси көтөрүлдү
Министрлер кабинетинин төрагасы Адылбек Касымалиев Балыкчы шаардык жалпы дарыгердик практика борборуна барып, медициналык мекеменин ишмердүүлүгү менен таанышты.
Иш сапардын жүрүшүндө ал бейтаптарды кабыл алуу шарттарын, көрсөтүлүп жаткан медициналык кызматтардын сапатын, ошондой эле борбордун кадрдык жана материалдык-техникалык камсыздалышын көрүп чыкты.
Өзгөчө көңүл оорукананын алдында ачылган жаңы кардиологиялык бөлүмгө бурулду. Аталган бөлүм академик М. Миррахимов атындагы Улуттук кардиология жана терапия борборунун түзүмүнө кирип, жүрөк-кан тамыр оорулары бар бейтаптарга жеринде адистештирилген жардам көрсөтүүгө мүмкүнчүлүк түзөт.
Ошол эле учурда текшерүү маалында оорукананын негизги имаратынын абалы талапка жооп бербей турганы белгиленди. Инфраструктуралык көйгөйлөргө байланыштуу жаңы имарат куруу зарылдыгы айтылды.
Жыйынтыгында Адылбек Касымалиев Саламаттык сактоо министрлигине, Архитектура, курулуш жана турак жай-коммуналдык чарба министрлигине, ошондой эле жергиликтүү бийлик органдарына Балыкчы шаардык ооруканасы үчүн жаңы заманбап имарат куруу боюнча финансылык-экономикалык эсептөөлөрдү жүргүзүүнү тапшырды.
