Бишкекте үй-бүлөлүк зомбулукка шектелген жаран кармалды
Бишкекте жубайынын арызынан кийин үй-бүлөлүк зомбулукка шектелген жаран кармалды. Бул тууралуу Бишкек шаардык ички иштер башкармалыгы билдирди.
Маалыматка ылайык, 13-июнда Биринчи май райондук милициясына Ш.А. аттуу жаран кайрылып, күйөөсүнө карата чара көрүүнү өтүнгөн. Анын айтымында, күйөөсү мас абалында үйүндө жаңжал чыгарып, тынчын алган.
Бул факты боюнча 56 жаштагы Т.Р. аттуу жаран кармалып, Бузуулар кодексинин 70-беренеси менен убактылуу кармоочу жайга киргизилген.
Чогултулган материалдар мыйзам чегинде кароо үчүн райондук сотко жөнөтүлгөн.
Милициянын маалыматына караганда, шектүү мас абалында өзүнүн автоунаасын өрттөп жибергени да аныкталган. Бирок анын жубайы бул окуя боюнча арыз жазуудан баш тарткан. Ага карабастан, маалымат каттоого алынып, учурда текшерүү иштери жүргүзүлүүдө.
Текшерүүнүн жыйынтыгында окуяга тиешелүү укуктук баа берилери белгиленди.
Расмий маалыматтарга ылайык, Кыргызстанда 2025-жылы үй-бүлөлүк зомбулук фактылары боюнча 656 кылмыш иши козголгон. Алардын ичинен 458 аял, 104 бала жана 94 эркек жабырлануучу катары катталган. Ошондой эле "Үй-бүлөлүк зомбулук" беренеси боюнча 36 кылмыш иши ачылып, бул багыттагы укук бузуулар үчүн 6 миңден ашуун административдик протокол түзүлгөн.
