Чолпон-Атадагы ат майданда оңдоп-түзөө иштери жүрүүдө
Курулуш, архитектура жана турак жай-коммуналдык чарба министри Нурдан Орунтаев 13-июндагы Ысык-Көл облусуна болгон жумушчу сапарында Чолпон-Ата шаарындагы ат майданда жүргүзүлүп жаткан капиталдык оңдоо иштеринин жүрүшү менен таанышты.
Аталган министрликтин маалыматына ылайык, 2026-жылы башталган долбоордун алкагында объекттин негизги бөлүктөрү жаңыланууда. Тактап айтканда, VIP-зона, конок бөлмөлөрү, трибуналар, административдик жайлар, жер төлө бөлүгү жана унаа токтотуучу жайлар оңдолуп-түзөлүүдө.
Ошондой эле кире бериш аймагындагы кафель жабуулары алмаштырылып, инженердик тармактар толугу менен жаңыртылууда. Учурда иштер бекитилген тартипке ылайык жүргүзүлүүдө. Министр объекттеги иштердин сапатына жана курулуш темпине өзгөчө көңүл буруп, бардык иштерди белгиленген мөөнөттө бүткөрүү боюнча тиешелүү тапшырмаларды берди.
Объект республикалык бюджеттин эсебинен каржыланып, иштердин жүрүшү Курулуш министрлиги тарабынан көзөмөлдөнүүдө.
Белгилей кетсек, Чолпон-Ата ат майданынын тарыхы 1930-жылдардан башталат. Объект 2014-жылы I Дүйнөлүк көчмөндөр оюндарына карата оңдолуп, 2018-жылы толук жаңыланган. Бүгүнкү күндө ал 10 миң көрүүчүгө ылайыкталган заманбап спорттук комплекс болуп саналат.
