Жерге-Талда 28,8 млн сомдук спорт зал салынууда
Кербен шаарына караштуу Жерге-Тал айылында заманбап спорт залдын курулушу башталды. Бул тууралуу президенттин Жалал-Абад облусундагы өкүлчүлүгү билдирди.
Маалыматка ылайык, долбоордун тендердик баасы 28 миллион 856 миң сомду түзөт. Анын 26 миллион 170 миң сому Жалал-Абад облустук өнүктүрүү фонду тарабынан каржыланса, калган бөлүгү жергиликтүү бийлик жана айыл тургундарынын колдоосу менен камсыздалууда.
Президенттин Жалал-Абад облусундагы ыйгарым укуктуу өкүлү Тилек Текебаев жаштарды спортко тартуу, сергек жашоо образын жайылтуу жана аймактардагы социалдык инфраструктураны өнүктүрүү мамлекеттик саясаттын артыкчылыктуу багыттарынын бири экенин айтты.
Белгиленгендей, жаңы спорттук жайдын пайдаланууга берилиши менен айыл жашоочулары үчүн дене тарбия жана спорт менен машыгууга кеңири мүмкүнчүлүктөр түзүлөрү күтүлүүдө.
