Ар бир окуучу 14 сомдук тамак жесе, кийинки жыдан тарта 40 сомго жогорулайт
Министрлер Кабинетинин Төрагасы Адылбек Касымалиев өлкөнүн социалдык-экономикалык өнүгүүсүн талкуулаган кезектеги аппараттык жыйынын өткөрдү. Бул тууралуу президенттик админстрациянын маалыматтык саясат бөлүмүнөн билдиришти.
Жолугушуунун жүрүшүндө МинКаб Төрагасы Президенттин Жарлыгы менен Экономика жана коммерция министри Бакыт Сыдыковду Президенттин атайын тапшырмалар боюнча атайын өкүлү кылып дайындоо жөнүндө маалымат берди.
Талкуунун негизги темасы лицензиялык-уруксат берүү тутумун реформалоо, тактап айтканда, таксиге лицензия алуунун жаңы электрондук процессин ишке киргизүү болду. Айдоочулар азыр кагаз иштеринен толугу менен бошотулуп, атайын мобилдик тиркемелерди колдонуу менен жөнөкөйлөштүрүлгөн жол менен уруксат ала алышат.
"Биз мүмкүн болушунча ыңгайлуу жана ачык-айкын санариптик чөйрөнү түздүк. Эми биздин максат ар бир айдоочуга жол-жобосун, анын ичинде медициналык жана техникалык кароодон өтүүдөгү милдеттүү талаптарды жеткирүү. Ошол эле учурда жүк ташуучу унаалардын айдоочуларына так эскертишибиз керек: үстүбүздөгү жылдын 1-июлунан баштап тиешелүү лицензиясы жок такси айдаган айдоочулар мыйзам чегинде катуу жоопкерчиликке тартылат", - деп белгиледи Адылбек Касымалиев.
Жыйында 1-4-класстын окуучуларынын тамактануу сапатына көңүл бурулду. Анализ көрсөткөндөй, бир окуучуга күнүнө 14 сом өлчөмүндөгү азыркы норма балдардын толук жана тең салмактуу тамактануусу менен камсыз кылуу үчүн жетишсиз.
Адылбек Касымалиев Кыргыз Республикасынын Президентинин чечими менен стандарт кескин жогорулап, 2027-жылдын 1-январынан тарта бир окуучу үчүн күнүнө 40 сомго чейин көтөрүлөрүн билдирди.
"Балдарыбыздын ден соолугу мамлекеттин абсолюттук приоритети болуп саналат. Каржылоону үч эсеге жакын көбөйтүү өлкөнүн ар бир мектебинде тамак-аштын сапатын реалдуу, сезилерлик жакшыртууга алып келиши керек. Биздин милдет - келечек муундар үчүн бул маанилүү чечимдин кемчиликсиз жана өз убагында аткарылышын камсыз кылуу", - деп жыйынтыктады МинКаб Төрагасы.
Бул маселе боюнча МинКаб Төрагасы Финансы министрлигине 2027-жылга республикалык бюджетти пландаштырууда зарыл болгон финансылык каражаттардын бөлүнүшүн камсыз кылууну жана бардык даярдык процедураларын алдын ала жүргүзүүнү тапшырды. Ошону менен бирге Саламаттыкты сактоо министрлигине, Агартуу министрлиги менен бирдикте калориялуулугун, тамак-аштык баалуулугун, жаш өзгөчөлүгүн эске алуу менен мектеп окуучулары үчүн жаңы, тең салмактуу менюну иштеп чыгуу жана бекитүү тапшырылды. Бишкек жана Ош шаарларынын мэрияларына 2027-жылдын 1-январынан тарта жаңыланган менюну үзгүлтүксүз ишке киргизүү үчүн муниципалдык ченемдик укуктук актыларды каржылоонун жаңы стандарттарына тез арада шайкеш келтирүү тапшырылды.
