Караколдо 440 млн сомго мектеп курулууда
Курулуш министрлиги тарабынан Каракол шаарында 750 орундуу жаңы мектеп курулууда. Объектинин курулушу 2025-жылдын декабрь айында башталып, республикалык бюджеттин эсебинен каржыланууда. Мектептин жалпы наркы 440 миллион сомду түзөт.
Курулуш министрлигинин маалыматына ылайык, мектеп заманбап үлгүдө курулуп, жалпы аянты 5 257 чарчы метрди түзөт. Анда негизги окуу класстары, ашкана, жыйындар залы жана бардык шарттары каралган спорт залы жайгашат. Мындан тышкары, волейбол, баскетбол жана футбол ойноо үчүн ачык спорт аянтчалары курулат.
Объектидеги курулуш-монтаждоо иштеринин жүрүшү жана сапаты Курулуш министрлигине караштуу Турак жай-жарандык курулуш департаменти тарабынан көзөмөлдөнүүдө.
Мектеп пайдаланууга берилгенден кийин эки мөөнөт менен 1 500дөн ашык окуучунун билим алуусуна шарт түзүлөт. Бул долбоор шаардагы социалдык инфраструктураны жакшыртууга жана балдардын сапаттуу билим алуусу үчүн заманбап шарттарды түзүүгө багытталган.
