Батумиде шайлоодогу маалыматтык коопсуздук маселелери каралууда
17–18-июнь күндөрү Грузиянын Батуми шаарында шайлоону башкаруу органдарынын жыйыны өтүүдө. Бул тууралуу Борбордук шайлоо комиссиясынан билдиришти.
Маалыматка ылайык, иш-чарага дүйнөнүн ар кыл өлкөлөрүнөн шайлоо органдарынын өкүлдөрү, эл аралык уюмдардын адистери катышууда. Кыргызстандан БШКнын басма сөз катчысы Наргиза Мансурова-Ябута жана эл аралык кызматташтык жана шайлоо процессинин катышуучулары менен өз ара аракеттенүү бөлүмүнүн адиси Үмүт Исакова катышып жатышат.
Жыйындын жүрүшүндө шайлоо мезгилиндеги жалган маалыматтын жайылышы, социалдык тармактардын коомдук пикирге тийгизген таасири, шайлоо ишинде жасалма интеллектти колдонуу, маалыматтык коопсуздукту камсыздоо жана жарандардын шайлоо институттарына болгон ишенимин чыңдоо маселелери талкууланууда.
Форумдун жалган маалыматты саясий чакырык катары кароого арналган экинчи сессиясында БШК өкүлдөрү шайлоо учурунда жалган жана такталбаган маалыматтарга каршы аракеттенүү боюнча Кыргызстандын тажрыйбасын сунушташты.
Баяндамада санариптик технологиялардын ыкчам өнүгүшү шартында коомчулуктун шайлоого болгон ишенимин сактоо, манипуляциялык контентке каршы алдын алуу чараларын күчөтүү жана жасалма интеллектти колдонууга байланышкан тобокелдиктерди азайтуу маселелерине өзгөчө көңүл бурулду.
Форумду Грузиянын Борбордук шайлоо комиссиясы Дүйнөлүк шайлоо органдарынын ассоциациясы (A-WEB) менен биргеликте уюштурууда. Иш-чарага Европа, Азия, Африка, Түндүк жана Латын Америкасынын шайлоо органдарынын өкүлдөрү, ошондой эле эл аралык уюмдардын жана эксперттик коомчулуктун өкүлдөрү катышууда.
