Нарында саркынды суу тазалоо жайынын курулушу башталды
“Нарын шаарында таза суу менен камсыздоо жана канализация системасын ишке ашыруу” долбоорунун II фазасынын алкагында жаңы саркынды суу тазалоо жайынын курулушуна капсула салынды. Бул тууралуу Нарын шаардык мэриясынын маалымат кызматы билдирди.
Маалыматка ылайык, Нарын шаары үчүн өзгөчө маанилүү санитардык-экологиялык мыкты шарт түзүүчү обьектинин курулушун баштоо салтанатына Министрлер Кабинетинин Төрагасынын орун басары Эрлист Акунбеков, Президенттин Нарын облусундагы ыйгарым укуктуу өкүлү Нурбек Сатаров, Нарын шаарынын мэри Жылдызбек Беккелдиев, Швейцария Конфедерациясынын Кыргызстандагы элчиси Сироко, Европа Биримдигинин Кыргызстандагы элчиси Реми, Европалык реконструкциялоо жана өнүктүрүү банкынын аймактык директору Айтен Рустамова, Швейцариянын Экономикалык маселелер боюнча мамлекеттик катчылыгынын инфраструктураны каржылоо бөлүмүнүн башчысы Дагмар Фогель жана жергиликтүү тургундар катышышты.
Шаардагы 20 миң адамга эсептелген заманбап үлгүдөгү агынды суу тазалоо жайы саркынды сууну 3 этап механикалык, биологиялык жана химиялык тазалоодон өткөрүп, шаардын чыгыш жана батыш бөлүгүнөн жаңы 3 миңдей абонент кошулууда.
Аталган долбоордун II фазасынын алкагында Нарын шаарынын Чыгыш аймагына 6, Батыш аймагына 6 жалпы 12 чакырым канализация тутуму тартылды.
