Киреше салыгын жеңилдетүү демилгеси коомдук талкууга чыкты
"Салык кодексине өзгөртүүлөрдү киргизүү жөнүндө" мыйзам долбоору коомдук талкууга коюлду. Бул тууралуу Жогорку Кеңештин басма сөз кызматы билдирди.
Маалыматка ылайык, салыктык чегерүүлөрдүн суммасын эсептөө механизмдерине байланышкан акыркы өзгөртүүлөр 2001-жылдын декабрь айында киргизилген. Ошондон бери 25 жыл аралыгында бул ченемдер өзгөртүлгөн эмес.
Бул мезгил ичинде өлкөдө орточо эмгек акы 26 эсеге жогорулап, жарандардын жашоо тиричилигине байланышкан чыгымдар да кыйла өскөнү белгиленет. Ушуга байланыштуу мыйзам долбоорунда салыктык чегерүүлөрдүн көлөмүн көбөйтүү сунушталууда.
Демилгечилер мисал катары үй-бүлөнү көрсөтүшкөн: "Айлык маянасы 50 миң сом болгон кызматкердин жубайы жана үч баласы бар. Учурда мындай кызматкер айына киреше салыгы катары орточо 4 895 сом төлөйт. Мыйзам кабыл алынса бул сумма болжол менен 2 миң сомго чейин төмөндөп, үй-бүлө ай сайын 3 миң сомго жакын үнөмдөөгө жетишет".
Дүйнөлүк тажрыйбада салыктык чегерүү жарандарга салык салынуучу кирешенин көлөмүн азайтууга же мурда төлөнгөн киреше салыгынын бир бөлүгүн кайтарып алууга мүмкүнчүлүк берери айтылат.
Мыйзам долбоору боюнча толук маалымат Жогорку Кеңештин расмий сайтына жайгаштырылган.
