Кыргыз-өзбек өнөр жай өнөктөштүгү чыңдалууда
Инвестициялар боюнча улуттук агенттиктин директору Равшанбек Сабиров Өзбекстанга болгон жумушчу сапарынын алкагында Ташкент шаарындагы TEXNOPARK өнөр жай кластерине барды. Бул тууралуу аталган агенттиктен билдиришти.
Сапардын жүрүшүндө кыргыз делегациясы Өзбекстандын ири өнөр жай комплекстеринин бири саналган технопарктын ишмердүүлүгү менен таанышып, анын өндүрүштүк мүмкүнчүлүктөрүнө күбө болду.
Жолугушууларда өнөр жай кооперациясын өнүктүрүү, өндүрүштүк чынжырчаларды түзүү, заманбап технологияларды киргизүү жана өнөр жай тармагына инвестиция тартуу маселелери талкууланды.
Ошондой эле TEXNOPARKтын тажрыйбасы Кыргызстанда индустриалдык аянтчаларды жана өндүрүштүк кластерлерди өнүктүрүүдө колдонууга боло турган натыйжалуу үлгү катары бааланды.
Белгиленгендей, иш сапар алдыңкы тажрыйбаны үйрөнүүгө, жаңы ишкердик байланыштарды түзүүгө жана Кыргызстан менен Өзбекстандын ортосундагы инвестициялык кызматташтыкты мындан ары чыңдоого багытталган.
