Кыргызстан менен Жапония кен байлыктарды изилдөө жаатында кызматташат
Жаратылыш ресурстары, экология жана техникалык көзөмөл министри Акыл Токтобаев Жапониянын JOGMEC мамлекеттик корпорациясынын төрагасы Шинжи Тарутоко жана Жапон-Кыргыз экономикалык кызматташтык ассоциациясынын өкүлдөрү менен жолугушту.
Министрлик билдиргендей, жолугушууда Кыргызстандын минералдык-сырьёлук ресурстары жана эки тараптуу кызматташуунун келечеги талкууланды.
Акыл Токтобаев өлкөнүн кен байлыктарын изилдөө жана пайдалануу жаатында жапон уюмдары жана компаниялары менен узак мөөнөттүү өнөктөштүктү өнүктүрүүгө кызыкдар экенин билдирди.
Ошондой эле JOGMEC менен геологиялык изилдөөлөрдү жүргүзүү жана жер казынасын экологиялык талаптарды сактоо менен пайдалануу боюнча кызматташуу мүмкүнчүлүктөрүнө өзгөчө көңүл бурулду.
Өз кезегинде жапон тарап Кыргызстанды жер казынасын пайдалануу тармагындагы келечектүү өнөктөш катары карап жатканын белгилеп, өз ара пайдалуу кызматташтыкты мындан ары өнүктүрүүгө даяр экенин билдирди.
