Сокулукта мыйзамсыз курулуш үчүн 200 миң сом айып пул салынды
Сокулук районунда уруксатсыз башталган 8 кабаттуу турак жайдын курулушу токтотулуп, компанияга айып пул салынды. Бул тууралуу Мамлекеттик архитектура-курулуш контролдоо департаменти билдирди.
Маалыматка ылайык, Чүй региондук башкармалыгы тарабынан Фрунзе көчөсү 175 дарегиндеги объект текшерилип, шаар куруу мыйзамдарынын бузулушу аныкталган.
Текшерүүнүн жүрүшүндө курулуш иштери тиешелүү уруксат берүүчү документтерсиз башталганы жана объект мамлекеттик реестрге катталбаганы белгилүү болгон. Ошондой эле жер казуу иштери да мыйзамсыз жүргүзүлгөнү айтылды.
Аталган фактылар боюнча “Ремстрой” ЖЧКсына протокол түзүлүп, 200 миң сом айып пул салынды. Мындан тышкары, мыйзам бузуулар толук жоюлганга чейин курулуш иштери токтотулду.
