Адылбек Касымалиев Санкт-Петербургдагы окуу жайда лекция окуду
Министрлер Кабинетинин төрагасы Адылбек Касымалиев Орусияга болгон жумуш сапарынын алкагында Санкт-Петербург мамлекеттик экономикалык университетинде студенттер жана окутуучулар үчүн мейман лекция окуду. Бул тууралуу өкмөттүн басма сөз кызматы билдирди.
"Кыргызстандын экономикалык жетишкендиктери жана кыргыз-орус мамилелеринин учурдагы өнүгүүсү" темасына арналган лекциянын жүрүшүндө өкмөт башчысы эки өлкөнүн ортосундагы соода-экономикалык кызматташтыктын учурдагы абалы жана келечектеги мүмкүнчүлүктөрү тууралуу кеңири маалымат берди.
Адылбек Касымалиев бул окуу жай анын кесиптик калыптануусунда өзгөчө орун ээлерин белгилеп, дал ушул университетте алган билими экономикалык процесстерди жана мамлекеттик башкаруунун маанисин түшүнүүгө өбөлгө болгонун айтты.
Лекциянын соңунда ал студенттерге кайрылып, алардын келечекте кабыл ала турган чечимдери мамлекеттердин өнүгүүсүнө, экономиканын натыйжалуулугуна жана жарандардын бакубат жашоосуна түздөн-түз таасир этерин белгиледи.
Иш-чаранын алдында Адылбек Касымалиевге Санкт-Петербург мамлекеттик экономикалык университетинин Ардактуу доктору наамы ыйгарылып, ал университеттин жетекчилигине жана Окумуштуулар кеңешине көрсөтүлгөн сый-урмат үчүн ыраазычылык билдирди.
Белгилей кетсек, Адылбек Касымалиев аталган университетти 1984-жылы экономист адистиги боюнча аяктаган.
