Депутат май куюучу станцияларда алкоголдук ичимдиктерди сатууга тыюу салууну сунуштады
Жогорку Кеңештин депутаты Медер Чотонов “Этил спиртин өндүрүүгө, импорттоого, сактоого жана сатып өткөрүүгө мамлекеттик монополия жана алкоголдук продукцияны өндүрүүнү мамлекеттик жөнгө салуу жөнүндө” мыйзамга өзгөртүү киргизүүнү сунуштоодо. Бул тууралуу парламенттин басма сөз кызматы билдирди.
Демилгеге ылайык, май куюучу станцияларда жана аларга чектеш аймактарда алкоголдук ичимдиктерди сатууга тыюу салынат.
Сунуштун максаты — жол кырсыктарын алдын алуу, коомдук коопсуздукту күчөтүү жана мас абалында унаа башкаруу учурларын азайтуу.
Эл аралык тажрыйбада транспорттук инфраструктурага жакын жерлерде алкоголдук ичимдиктерди сатууга чектөө киргизүү жол коопсуздугун камсыздоонун натыйжалуу ыкмасы экени үлгү катары көрсөтүлгөн.
Демилге боюнча ар бир жаран өз пикирин билдире алат.
