ИИМ эмгек миграциясы боюнча чараларды күчөтүү демилгесин көтөрдү
Ички иштер министрлиги эмгек миграциясы чөйрөсүндөгү мыйзам бузууларга карата жоопкерчиликти күчөтүүгө багытталган мыйзам долбоорун коомдук талкууга чыгарды.
Документте чет өлкөдө жарандарды мыйзамсыз жумушка орноштурган учурлар үчүн айып пулдарды көбөйтүү жана чет элдик эмгек күчүн мыйзамсыз тартууга карата жаза чараларын катаалдаштыруу каралган.
Маалыматка ылайык, 2023-жылы чет элдик жумушчу күчүн мыйзамсыз тартуу боюнча 59 учур катталган. Бул көрсөткүч 2025-жылы 265 учурга чейин өскөн. Ал эми 2026-жылдын алгачкы 5 айында эле 106 учур аныкталган.
Учурдагы тартипке ылайык, жалпы мыйзамсыз иштегендер үчүн жумуш берген жеке жактарга 20 миң сом, юридикалык жактарга 65 миң сом өлчөмүндө айып пул салынат. Ал эми жаңы сунуш күчүнө кирсе, бул сумма мыйзамсыз тартылган жумушчунун ар бирине өзүнчө эсептелет.
Ошондой эле жарандарды чет өлкөгө мыйзамсыз жумушка орноштурган ортомчу жеке жактар үчүн санкция 15 миң сомдон 20 миң сомго, юридикалык жактар үчүн 55 миң сомдон 100 миң сомго чейин көтөрүлөт. Кайталап бузуу жасалса, 30 миң сом же 150 миң сом айып пул салынат.
Ички иштер министрлиги учурдагы чара мыйзам бузгандарга жетиштүү таасир этпей жатканын айтып, жаңы демилге жарандардын эмгек укуктарын коргоого жана миграциялык иштердин ачыктыгын жогорулатууга жардам берерин белгиледи.
