Кожентте Баткендин инвестициялык мүмкүнчүлүктөрү көрсөтүлдү
Баткен облусунун делегациясы Тажикстандын Кожент шаарында өтүп жаткан XII эл аралык "Согди-2026" соода-инвестициялык жарманкесине катышып, аймактын инвестициялык мүмкүнчүлүктөрүн тааныштырууда. Иш-чарага 20 өлкөдөн 500дөн ашык инвестор, ишкер жана расмий өкүлдөр чогулду. Бул тууралуу өкүлчүлүктөн билдиришти.
Кожент шаарында өтүп жаткан жарманкенин алкагында "Соода жана инвестициялык мүмкүнчүлүктөр, кызматташтыктын келечеги" аталышындагы эл аралык форум уюштурулду.
Форумга Баткен облусу башчысынын орун басары Абдирашит Ташбалтаев, Баткен районунун акими Данияр Иманалиев жана бир катар ишкерлер катышты.
Уюштуруучулардын маалыматына караганда, иш-чарада компаниялардын ишмердүүлүгү, инвестициялык долбоорлору жана кызматташуу мүмкүнчүлүктөрү сунушталууда.
Иш-чара соода-экономикалык байланыштарды кеңейтүү, инвестиция тартуу жана эки тараптуу кызматташтыкты өнүктүрүүнү көздөйт.
