Кыргызстанда эс алуу жайларынын саны эки жылда 63,8%га өстү
2024-жылдан бери Кыргызстанда туристтерди тейлөөчү жана коомдук тамактануу жайларынын саны кыйла өсүп, өлкөнүн меймандостук индустриясы кеңейди.
2ГИС картографиялык кызматынын маалыматына ылайык, соңку эки жылдагы өзгөрүүлөр меймандостук жана коомдук тамактануу тармагындагы сегиз негизги түркүм боюнча талданган. Алардын катарына коттеждер жана конок үйлөрү, эс алуу, тез татым жайлары, мейманканалар, кафелер, ресторандар, суши-барлар жана хостелдер кирген.
Өсүү көрсөткүчү боюнча "Эс алуу базалары" биринчи орунга чыккан. Эки жыл ичинде алардын саны 63,8%га көбөйүп, 2024-жылдагы 260 объект болсо, 2026-жылы 426 объектке жеткен.
Мейманканалар да олуттуу өсүш көрсөткөн. Бул тармактагы объекттердин саны 46,2%га өсүп, 628ден 918ге чейин жеткен. Ал эми коттеждерди жана конок үйлөрүн ижарага берүү жаатында өсүш 39,8%ды түзгөн.
Коомдук тамактануу жайларынын ичинен эң жогорку өсүш тез татым жайларында байкалган. Алардын саны эки жыл ичинде 38,3%га көбөйүп, 1 миң 675тен 2 миң 317ге жеткен.
