Скутер жана мопед айдоочуларына камералар боюнча эскертүү берилди
Жол кыймылынын коопсуздугун камсыздоо башкармалыгы скутер жана мопед айдоочуларына жол эрежелерин так сактоо зарылдыгын эскертти.
Маалыматка ылайык, коомдук жайларда орнотулган “Коопсуз өлкө” долбоорунун камералары күнү-түнү үзгүлтүксүз иштеп, жол эрежелерин бузган учурларды автоматтык түрдө каттайт.
Мындан тышкары, видеокөзөмөл системалары мыйзам бузуу фактыларын аныктоо менен катар жүздөрдү таануу мүмкүнчүлүгүнө да ээ экени белгиленди.
Аталган башкармалыктын билдирүүсүндө акыркы учурда скутер, мопед жана башка эки дөңгөлөктүү транспорт каражаттарынын айдоочулары тарабынан жол эрежелерин одоно бузуу учурлары көбөйүп, бул жол кыймылынын коопсуздугуна олуттуу коркунуч жаратып жатканы айтылат.
Мындай аракеттер айдоочулардын гана эмес, жөө жүргүнчүлөрдүн да өмүрүнө жана ден соолугуна зыян келтириши мүмкүн экени белгиленди.
Жол кыймылынын коопсуздугун камсыздоо башкармалыгы жарандарды жол эрежелерин так сактоого жана жоопкерчиликтүү болууга чакырды.
