Талас: "Адис Нан" ишканасынын каржылоо жана өнүктүрүү талкууланды
Суу ресурстары, айыл чарба жана кайра иштетүү өнөр жайы министринин орун басары Рустам Балтабаев Талас облусунда "100 өнөр жай ишканасы – 2026" тизмесине кирген ишканаларды кыдыруунун алкагында Манас районундагы "Адис Нан" ЖЧКсында болуп, долбоордун учурдагы абалы жана аны мындан ары өнүктүрүү маселелери боюнча кеңешме өткөрдү.
Министрликтин басма сөз кызматы билдиргендей, кеңешмеге президенттин Талас облусундагы ыйгарым укуктуу өкүлүнүн биринчи орун басары М. Байжигитов, жергиликтүү бийлик өкүлдөрү, тармактык мамлекеттик түзүмдөрдүн кызматкерлери, райондук агрардык өнүктүрүү башкармалыгынын жана финансы институттарынын өкүлдөрү катышты.
"Адис Нан" ЖЧКсы Кызыл-Жылдыз айылында нан жана ундан жасалган азыктарды өндүрөт. Долбоордун алкагында 90 жумуш ордун түзүү каралса, учурда анын 20га жакыны ачылган. Бүгүнкү күндө өндүрүштүк комплекстин курулушу толугу менен аяктап, үч өндүрүштүк цех пайдаланууга берилген.
Ишкананын өндүрүштүк кубаттуулугу суткасына 2,5 тоннага чейин унду кайра иштетүүгө мүмкүндүк берет. Учурда чыгарылган өндүрүмдөр Манас районунда жана Талас облусунун аймагында сатылууда.
Жолугушууда долбоорду кошумча каржылоо жана ишкананы толук кубаттуулукта иштетүү маселелери талкууланды.
