Таласта үрөнчүлүк борбордун өндүрүш жана экспорттук багыттары каралды
Суу ресурстары, айыл чарба жана кайра иштетүү өнөр жайы министринин орун басары Рустам Балтабаев Талас шаарындагы KVS айыл чарба кооперативинин ишмердүүлүгү менен таанышты. Бул тууралуу министрликтин басма сөз кызматы маалымдады.
KVS кооперативи үрөнчүлүк жана айыл чарба өндүрүмдөрүн экспортко чыгаруу багытында иш алып барган алдыңкы ишканалардын бири болуп саналат. Ишкана негизинен жашылча өсүмдүктөрүнүн үрөнүн өндүрүүгө адистешкен. Учурда кооператив ашкабактын үрөнүн Жапонияга экспорттоп, эл аралык кызматташтыкты кеңейтүүдө.
Иш сапардын жүрүшүндө министрдин орун басары үрөнчүлүк борбордун жана жашылча өндүрүмдөрүн кайра иштетүүчү бөлүмдүн иши менен таанышты. Өзгөчө көңүл ашкабактан үрөн алынгандан кийинки калдыктарды кайра иштетүүгө бурулду. Бул чийки заттан шорпо жана кошумча азыктар өндүрүлүүдө.
Жолугушууда өндүрүштү кеңейтүү, кайра иштетүү кубаттуулуктарын жогорулатуу жана инвестиция тартуу маселелери талкууланды.
Ошондой эле министрдин орун басары 2030-жылга чейин ата мекендик өндүрүмдүн экспортун эки эсеге көбөйтүү максаты коюлганын белгилеп, бул багытта KVS сыяктуу ишканалардын ролу маанилүү экенин белгиледи.
