Ак-Таш жайлоосунда жайытты тепселегендерге айып пул салынды
Экологиялык жана техникалык көзөмөл кызматы жана Аламүдүн Райондук ички иштер башкармалыгынын кызматкерлери Кашка-Суу аймагындагы Ак-Таш жайлоосунда рейд жүргүздү. Бул тууралуу Жаратылыш ресурстары, экология жана техникалык көзөмөлдөө министрлигинен билдиришти.
Текшерүүнүн жүрүшүндө унаа жана эндуро мотоциклдери менен жайыт жерлерге кирип, чөп катмарын тепселеп, жаратылышка зыян келтирген жарандар аныкталды.
Аталган фактылар боюнча Укук бузуулар жөнүндө кодекстин негизинде 7 протокол түзүлүп, мыйзам бузгандарга жалпысынан 38 миң 500 сом өлчөмүндө айып пул салынды.
Мындан тышкары, жайыттарды бузууга себеп болгон транспорт каражаттары аймактан чыгарылды.
Рейд учурунда мототранспорт айдоочуларына жаратылыш аймактарында жүрүүдө белгиленген эрежелерди так сактоо зарылдыгы эскертилди.
Маалыматка ылайык, рейддик иш-чара айрым аймактарда мототранспорт каражаттарын пайдаланууну чектөө, ошондой эле жайыттарды жана жашыл аймактарды коргоо максатында уюштурулган.
