Белес капчыгайындагы туристтик комплекс августта ишке берилет
Баткен облусунун башчысы Мамыржан Рахимов Сүлүктү шаарына караштуу Белес капчыгайында курулуп жаткан “Белес-Резорт” туристтик комплексинин курулуш иштеринин жүрүшү менен жеринен таанышты.
Өкүлчүлүктөн билдиришкендей, облус жетекчиси курулушту белгиленген мөөнөттө жана сапаттуу бүтүрүү, ошондой эле пайдаланууга берилгенден кийин объектти максаттуу жана натыйжалуу иштетүү маанилүү экенин белгиледи.
Анын айтымында, туристтик комплекс туруктуу киреше алып келген жана өзүн-өзү каржылай алган заманбап ишканага айланышы негизги максаттардын бири.
Долбоор Баткен облусун өнүктүрүү программасынын алкагында ишке ашырылууда. Ага республикалык казынадан бөлүнгөн 500 млн сомдун ичинен 120 млн сом каржыланган, ошондой эле жергиликтүү казынадан кошумча 4 млн сом бөлүнгөн.
Белгиленгендей, заманбап туристтик комплексте эс алуучулар үчүн бардык шарттар түзүлүүдө. Анда жайгашуу жайлары, тамактануу жана эс алуу аймактары, ошондой эле спорттук жана маданий иш-чараларды өткөрүүгө ылайыкталган инфраструктура каралган.
Объект августта пайдаланууга берилери айтылды.
