Чоң-Кеминде ак илбирсти сактоого багытталган экологиялык фестиваль өтөт

11-июлда Кемин районундагы Шабдан айылында “Ак Илбирс ЭкоФест Чоң-Кемин 2026” экологиялык фестивалы өткөрүлөт. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.

Маалыматка ылайык, иш-чара ипподром аймагында саат 09:30да башталат. Фестивалдын быйылкы темасы — "Ак илбирс: Эко-билим берүү — Кыргызстандын туруктуу келечегинин негизи". Анын негизги максаты — экологиялык аң-сезимди жогорулатуу, жаратылышка жоопкерчиликтүү мамилени калыптандыруу, экотуризмди өнүктүрүү жана өлкөнүн символдорунун бири болгон ак илбирсти сактоо.

Иш-чараны "Илбирс — Зеленое поколение" коомдук фонду, Жаратылыш ресурстары, экология жана техникалык көзөмөл министрлиги, ошондой эле эл аралык жана жергиликтүү өнөктөштөр уюштурууда.

Катышуучуларга экологиялык өндүрүмдөрдүн көргөзмөсү, фотокөргөзмө, балдар сынактары, этно жана экологиялык мастер-класстар, ошондой эле тайган-шоу, каскадёрлордун программасы сыяктуу бир катар иш-чаралар сунушталат.

Фестиваль бардык каалоочулар үчүн ачык экени белгиленди.