Баткенде мигранттардын долбоорлору аркылуу 100дөн ашык жумуш орду түзүлдү
Президенттин Баткен облусундагы өкүлү Мамыржан Рахимов Эл аралык миграция уюмунун Кыргызстандагы жана Казакстандагы өкүлдөрү менен жолугушту.
Өкүлчүлүктүн маалыматына ылайык, делегация Баткенге Улуу Британиядан кайтып келген эмгек мигранттарынын ишкердик демилгелерин колдоо долбоорунун жыйынтыгын карашты.
2023–2025-жылдары “1+1” механизми аркылуу мекенге кайтып келген 59 жарандын бизнес-пландары каржыланып, алардын 39у Баткен облусунда ишке ашырылган.
Долбоордун натыйжасында 100дөн ашык жумуш орду түзүлүп, гранттык каржылоо 18,4 млн сомдон ашты. Ишкерлердин өздүк салымы 17 млн сомду түздү.
Ишке кирген долбоорлор айыл чарба, тигүү өндүрүшү, курулуш материалдары жана сүт азыктарын кайра иштетүү багыттарын камтыйт. Эл аралык өкүлдөр бул тажрыйбаны аймактык өнүгүүгө салым кошкон үлгүлүү демилге катары баалашты.
