Бостериде жаратылышты булгаган жарандар жоопкерчиликке тартылды
Ысык-Көл облусунда мыйзамсыз саркынды сууларды агызуу жана таштанды жайгаштыруу эрежелерин бузуу фактылары аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, экологиялык жана техникалык көзөмөл кызматынын кызматкерлери туристтик милиция менен биргеликте Ысык-Көл районунун Бостери айыл аймагында рейд жүргүзүшкөн.
Текшерүүнүн жүрүшүндө айрым жеке эс алуучу жайлар саркынды сууларды мыйзамсыз агызуу жана таштанды жайгаштыруу эрежелерин бузганы аныкталган.
Аталган фактылар боюнча Укук бузуулар жөнүндө кодексинин негизинде эки жаранга протокол түзүлүп, жалпы суммасы 15 миң 500 сом өлчөмүндө айып пул салынды.
Экологиялык жана техникалык көзөмөл кызматы жарандарды жана эс алуучу жайлардын ээлерин жаратылышка аяр мамиле кылууга, экологиялык талаптарды так сактоого чакырды.
