Эл аралык уюмдар Кыргызстандын суу тармагына 172 млн доллар бөлөт
Эл аралык каржы уюмдары жана өнүктүрүү боюнча өнөктөштөр Кыргызстандын сугат тутумун жаңылоо үчүн жалпысынан 172 миллион доллар бөлөт. Бул тууралуу "The Times of Central Asia" басылмасы жазды.
Маалыматка ылайык, каражат өлкөдөгү сугат каналдарын жана ирригациясын жакшыртууга багытталат. Долбоор суу ресурстарын натыйжалуу пайдаланууга, дыйкандарды сугат суу менен туруктуу камсыз кылууга жана айыл чарба өндүрүмдүүлүгүн жогорулатууга жардам берет.
Эске салсак, июндун башында Дүйнөлүк банк Кыргызстандын сугат тармагын өнүктүрүү боюнча улуттук программасын каржылоо үчүн 95,75 млн доллар бөлүүнү жактырган.
Мындан тышкары, Азия инфраструктуралык инвестиция банкы 50 млн доллар, Эл аралык өнүктүрүү фонду 20 млн доллар бөлөт. Ал эми Швейцариянын өнүктүрүү жана кызматташтык агенттиги 6,25 млн доллар өлчөмүндө грант берери айтылган.
Дүйнөлүк банктын Кыргызстандагы өкүлчүлүгүнүн башчысы Хью Ридделлдин айтымында, айыл чарба тармагы Кыргызстандын экономикасында маанилүү орунду ээлейт жана миңдеген адамдарды жумуш менен камсыз кыла алат. Бирок сугат тутумунун эскилиги жетип, суунун көп бөлүгү коромжуга учурап жаткандыктан, тармактын мүмкүнчүлүгү толук пайдаланылбай келет.
