Инвестиция агенттиги эл аралык компания менен өнөктөштүктү талкуулады

23-июнда Инвестициялар боюнча улуттук агенттиктин директору Равшанбек Сабиров архитектуралык долбоорлоо, инженердик чечимдер жана инфраструктуралык объектилерди өнүктүрүү багытында иш алып барган "James Cubitt & Partners" компаниясынын өкүлдөрү менен жолугушту.

Аталган мекеменин маалыматына ылайык, жолугушууда тараптар Кыргызстандын инвестициялык мүмкүнчүлүктөрүн, инвестицияларды тартуу боюнча мамлекеттик саясаттын артыкчылыктарын жана келечектеги кызматташуу багыттарын талкуулашты.

Равшанбек Сабиров инфратүзүмдү өнүктүрүү жана социалдык объектилердин сапатын жогорулатуу өлкө үчүн артыкчылыктуу багыттардын бири экенин белгиледи. Анын айтымында, алдыңкы эл аралык тажрыйбаны колдонгон жана заманбап чечимдерди сунуштай алган чет элдик компаниялар менен кызматташууну кеңейтүү маанилүү.

Эл аралык "James Cubitt & Partners" компаниясынын өкүлдөрү Кыргызстандагы долбоорлорго катышуу мүмкүнчүлүктөрүн изилдөөгө кызыкдар экендиктерин билдиришти.

Жолугушуунун жыйынтыгында тараптар кызматташуунун келечектүү багыттары боюнча иш алып барууну жакшыртуу боюнча макулдашышты.