Соң-Көл жайлоосундагы мыйзамсыз курулуш үчүн 200 миң сом айып пул салынды

Кочкор районунун Чолпон айыл өкмөтүнө караштуу Соң-Көл жайлоосунда курулуп жаткан туристтик объектилерде бир катар мыйзам бузуу фактылары аныкталды. Бул тууралуу Курулуш, архитектура жана турак жай-коммуналдык чарба министрлигинин басма сөз кызматы билдирди.

Маалыматка ылайык, Мамлекеттик архитектура-курулуш контролдоо департаментинин Нарын региондук башкармалыгы жүргүзгөн текшерүүдө объектилер уруксат берүүчү документтерсиз курулуп жатканы белгилүү болгон.

Андан сырткары, курулуш иштеринде белгиленген эрежелер жана техникалык талаптар толук сакталбаганы аныкталган.

Натыйжада, жеке тараптар С.А.Н. жана Ш.у.Э.ге карата административдик чара көрүлүп, жалпы суммасы 200 миң сом айып пул салынды. Ошондой эле мыйзам бузууларды жоюу боюнча тапшырмалар берилди.

Мамлекеттик архитектура-курулуш контролдоо департаменти бардык уюмдарды жана жеке тараптарды курулуш иштерин мыйзам талаптарын так сактоо менен жүргүзүүгө чакырды.