Таласта курулуш талаптарын бузган тарапка 200 миң сом айып пул салынды
Талас облусунда курулуш талаптарын бузуу фактысы аныкталып, жооптуу тарапка административдик чара көрүлдү.Бул тууралуу Курулуш, архитектура жана турак жай-коммуналдык чарба министрлигинен билдиришти.
Мамлекеттик архитектура-курулуш көзөмөлдөө департаментинин Талас региондук башкармалыгы жүргүзгөн текшерүүнүн жүрүшүндө Кызыл-Адыр айылындагы Талас–Тараз унаа жолунун №12 дарегинде жайгашкан курулуш материалдарын сатуучу соода түйүндүн курулушунда мыйзам бузуулар аныкталган.
Маалыматка ылайык, объектте курулуш ченемдери толук сакталган эмес.
Натыйжада жаран К.Э.Ага карата протокол түзүлүп, 200 миң сом өлчөмүндө айып пул салынды.
Ошондой эле мыйзам бузууларды жоюу, курулуш иштерин белгиленген талаптарга ылайык жүргүзүү боюнча көрсөтмөлөр берилди.
