Улуттук коопсуздук боюнча мамлекеттик комитеттин 96 кызматкери иштен четтетилди
Улуттук коопсуздук боюнча мамлекеттик комитеттен мыйзамсыз иштерге аралашкан деген негизде 96 кызматкер кызматынан четтетилип, 24 кызматкерге карата кылмыш иши козголду. Бул тууралуу УКМК төрагасынын орун басары Алишер Эрбаев 23-июндагы Жогорку Кеңештин жыйынында билдирди.
Жыйындын жүрүшүндө эл өкүлү Элвира Сурабалдиева "атайын кызмат жемкорлукка тиешеси бар кызматкерлерден тазаланып жатабы?" деген суроосун узаткан.
Ага жооп берген Алишер Эрбаев Башкы прокуратура жарандардан түшкөн арыздар боюнча тиешелүү иштерди жүргүзүп жатканын белгиледи.
"Башкы прокуратура элден келген 386 арыз боюнча тиешелүү иштерди алып барып жатат. Купуя сырлар да бар. Аларды айта албайбыз", — деди ал.
Белгилей кетсек, 10-февралда президент Садыр Жапаров Камчыбек Ташиевди УКМК төрагасы жана Министрлер кабинетинин төрагасынын орун басары кызматынан бошоткон. Андан кийин атайын кызматтын бир катар кызматкерлери кармалып, кызматтан алынган.
