Бишкектин мэри Лондондо өткөн инвестициялык жыйынга катышты
Бишкек шаарынын мэри Айбек Жунушалиев Европа реконструкциялоо жана өнүктүрүү банкынын чакыруусу менен 22–23-июнда Лондондо өткөн "Жашыл шаарлар" программасынын инвестициялык жыйынына катышты.
Калаа мэриясынын басма сөз кызматы маалымдагандай, иш-чара "Эртеңки күнгө инвестиция салуу: баарына жеткиликтүү жашыл жана туруктуу шаарларды калыптандыруу" деген ураан алдында өттү.
Жыйында шаарлардын туруктуу өнүгүүсү, инфратүзүмдү жаңылоо жана экологиялык багыттагы долбоорлорго басым жасалды. Ага шаар жетекчилери, эл аралык каржы институттарынын өкүлдөрү жана адистер катышты.
Сапардын жүрүшүндө Бишкек шаарындагы райондук жылуулук менен камсыздоо тутумун жаңылоо долбоору боюнча келишимдерге кол коюлду. Долбоордун жалпы каржылоосу 64 миллион еврону түзөт. Бул иш-чаралар жылуулук менен камсыздоонун ишенимдүүлүгүн жогорулатып, борбор калаада абанын сапатын жакшыртууга өбөлгө түзөрү айтылды.
Ошондой эле сапардын алкагында ЕРӨБ жетекчилиги жана эл аралык өнөктөштөр менен жолугушуулар өткөрүлүп, Бишкекте мындан аркы инфратүзүмдүк долбоорлорду ишке ашыруу жана кызматташууну кеңейтүү маселелери талкууланды.
