Чүйдө экологиялык мыйзам бузуулар үчүн 25 миң 500 сом айып пул салынды
Экологиялык жана техникалык көзөмөл кызматынын Чүй регионалдык башкармалыгынын инспекторлору Жайыл жана Панфилов райондорунда, Кара-Балта капчыгайында бир катар экологиялык мыйзам бузууларды аныкташты.
Жаратылыш ресурстары министрлигинин басма сөз кызматы билдиргендей, мыйзамсыз балык уулоонун 10 фактысы катталып, Укук бузуулар жөнүндө кодекске ылайык мыйзам бузгандар административдик жоопкерчиликке тартылды.
Мындан тышкары, мыйзамсыз аңчылык кылуунун бир фактысы аныкталып, укук бузуучуга айып пул чегерилди. Ошондой эле жайыт жерлерине автотранспорт каражаттары менен мыйзамсыз кирүүнүн бир фактысы катталды.
Рейддердин жыйынтыгында жалпысынан 10 укук бузуу боюнча протокол түзүлүп, салынган айып пулдардын жалпы суммасы 25 миң 500 сомду түздү.
Ошол эле учурда инспекторлор экологиялык байлыктарды коргоо максатында жергиликтүү тургундар, балыкчылар, эс алуучулар жана эс алуу жайларынын ээлери арасында түшүндүрүү жана алдын алуу иштерин жүргүзүштү.
