Эмгек министрлигинде качкындардын укуктарын коргоо маселеси каралды
24-июнда Эмгек, социалдык камсыздоо жана миграция министринин биринчи орун басары Камчыбек Досматов БУУнун Качкындар иштери боюнча Жогорку комиссарынын башкармалыгынын Борбордук Азиядагы өкүлү Махир Сафарли менен жолугушту.
Маалыматка ылайык, жолугушууда Досматов Кыргызстан качкындардын укуктарын коргоо жаатында эл аралык уюмдар менен тыгыз кызматташып келерин белгилеп, Бириккен Улуттар Уюмунун колдоосуна ыраазычылык билдирди.
Тараптар качкындар боюнча глобалдык келишимдин алкагындагы милдеттенмелерди аткаруу маселелерин жана улуттук мыйзамдарды өркүндөтүү багыттарын талкуулашты.
Ошондой эле жолугушууда качкындар үчүн жол жүрүү документин киргизүү боюнча иштер каралды. Бул багыттагы жобо Министрлер кабинетинин 2026-жылдын 31-январындагы токтому менен бекитилип, 6-августтан тарта күчүнө кирери белгиленди.
Мындан тышкары, качкындарды эсепке алуу боюнча маалымат базасын түзүү мерчемделгени айтылды. Жолугушуунун соңунда тараптар кызматташтыкты чыңдоого даяр экенин билдиришти.
