Интернет-дүкөн аркылуу баңгизат таратууга шектелген жаран кармалды
Баңгизаттарды мыйзамсыз жүгүртүүгө каршы күрөшүү кызматы ири өлчөмдөгү синтетикалык маңзатты сатууга шектелген 22 жаштагы Э.Н.Б. аттуу жаранды кармады.
Ички иштер министрлигинен билдиришкендей, шектүүнү өздүк тинтүү учурунда анын жанынан 3 граммга жакын гашиш табылган.
Бишкекте жүргүзүлгөн ыкчам-издөө иш-чараларынын жүрүшүндө 1 килограммдан ашык психотроптук заттар кир жуугуч машинанын ичиндеги жашыруун жерге салынганы белгилүү болгон.
Тергөөнүн алдын ала маалыматына ылайык, кармалган жаран "К" аттуу интернет-дүкөндүн кызыкчылыгы үчүн иштеп, Бишкек шаары жана Чүй облусунун аймагында баңгизаттарды кабыл алуу, сактоо, таңгактоо жана жашыруун жайлар аркылуу таратуу менен алектенип жүргөн.
Алдын ала эсептөөлөр боюнча, алынган баңгизаттардын кара базардагы баасы 4,5 миллион сомдон ашышы мүмкүн. Милиция кызматкерлери убагында чара көрүп, 7 миңден ашык бир жолку синтетикалык баңгизат дозаларынын таралышына бөгөт койду.
Учурда тергөө иштери улантылып, баңгизатты жеткирүү жана таратууга тиешеси бар башка адамдарды аныктоо боюнча чаралар көрүлүүдө.
