Кеминде уруксатсыз курулуш үчүн 200 миң сом айып пул салынды
Мамлекеттик архитектура-курулуш көзөмөлдөө департаментинин Чүй региондук башкармалыгы Кемин районундагы “Комбикорм заводунун” объектисинде мыйзам бузуу фактысын аныктады.
Курулуш, архитектура жана турак жай-коммуналдык чарба министрлигинен билдиргендей, объектте курулуш иштери тиешелүү уруксат берүүчү документтерсиз башталгандыгы жана мамлекеттик бирдиктүү курулуш реестрине катталбаганы белгилүү болду. Бул аракеттер “Шаар куруу жана архитектура жөнүндө” мыйзамдын талаптарын бузуу катары бааланды.
Жыйынтыгында “БМ” ЖЧКсына карата протокол түзүлүп, 200 миң сом айып пул салынды. Ошондой эле мыйзам бузууга байланыштуу аныкталган кемчиликтерди жоюу боюнча милдеттүү көрсөтмөлөр берилди.
Министрлик курулуш компанияларын мыйзам талаптарын жана техникалык эрежелерди так сактоого чакырды.
