Манастагы жол кырсыгы боюнча маалыматтарды айдоочунун достору такташты
Манас шаарында Daewoo Tico унаасынын айдоочусунун өлүмү менен аяктаган жол кырсыгына байланыштуу кармалган жаран боюнча достору видеокайрылуу жасап, буга чейин тараган маалыматтарды такташты.
Алардын айтымында, интернетте өспүрүм кырсык болгон жерден качып кеткен жана кийин милиция тарабынан кармалган деген маалыматтар туура эмес. Досторунун билдирүүсүндө, ал милицияга өзү барган жана бардык зарыл иш-аракеттерден, анын ичинде медициналык күбөлөндүрүүдөн өткөн.
“Биз бул жерге досубузду актоо үчүн чогулган жокпуз. Мунун баарын тергөө аныктасын. Бирок тарап жаткан маалыматтарга тактоо киргизүүнү туура көрдүк”, — деп айтылат кайрылууда.
Ошондой эле алар социалдык тармактарда жазылган өспүрүм бай үй-бүлөнүн уулу жана жоопкерчиликтен кутулуп кетет деген маалыматтарды четке кагышты. Алардын айтымында, анын ата-энеси Орусияда иштейт жана материалдык жактан өзгөчө артыкчылыкка ээ эмес.
Мындан тышкары, достору ал спирт ичимдигин ичпей турганын, буга чейин мыйзам бузууга аралашпаганын белгилешти.
