Германияда 18 жаштагы кыргызстандык сууга чөгүп көз жумду
Германияда 18 жаштагы кыргызстандык жаран сууга чөгүп каза болду. Бул тууралуу Кыргызстандын Тышкы иштер министрлиги билдирди.
Маалыматка ылайык, А.А.К. аттуу жаран 23-июнда Германиянын Хёкстер шаарына жакын жайгашкан көлдө сууга түшүп жаткан учурда кырсыкка кабылган. Ал Германияга жай мезгилинде иштөө үчүн барган.
Учурда Кыргызстандын Германиядагы элчилиги жергиликтүү бийлик өкүлдөрү, иш берүүчү тарап жана маркумдун жакындары менен байланышып, документтерди тариздөө жана сөөгүн мекенине жеткирүү боюнча тиешелүү жардам көрсөтүүдө.
Бул жай башталгандан бери чет өлкөдө сууга чөгүп каза болгон кыргызстандыктардын экинчи учуру болуп калды. Буга чейин Түркиянын Анталья аймагында 24 жаштагы кыргызстандык 6-июнда деңизге түшүп жатып дайынсыз жоголуп, анын сөөгү 11-июнда табылган.
