Коруктардын жана улуттук парктардын аянтын азайтууга тыюу салуу демилгеленди
Министрлер кабинети Кыргызстандагы өзгөчө корголуучу жаратылыш аймактарынын аянтын кыскартууга жана алардын коргоо даражасын төмөндөтүүгө 20 жылга тыюу салган токтом долбоорун коомдук талкууга чыгарды.
Демилге жаратылыштын биологиялык ар түрдүүлүгүн сактоого, экологиялык коопсуздукту камсыз кылууга жана Кыргызстандын эл аралык милдеттенмелерин аткарууга багытталганы белгиленет.
Демилгечилер акыркы жылдары инфраструктуралык долбоорлорду ишке ашыруу жана кен казуу иштери менен байланышкан сунуштар көбөйүп, бул жаратылыш аймактарынын чек араларын өзгөртүү коркунучун жаратып жатканын белгилешүүдө.
Мораторий 20 жылга белгиленет жана аны ишке ашыруу үчүн кошумча бюджеттик каражат талап кылынбай турганы айтылды.
Мындан тышкары, 24-июнда Жогорку Кеңеште геологиялык парктарды түзүү боюнча мыйзам долбоору үч окуудан кабыл алынды.
Экологдор туризмди өнүктүрүү жүйөөсү менен акыркы жылдары коруктарга, улуттук парктарга конок үйлөр көп курулуп, автоунаа жана аркан жолдор курулуп жатканын сынга алып келишет.
